He aha tā te tirohanga e pātai nei - Te Tirohanga Tautoko Moniwhiwhi o Aotearoa

Ko ngā pātai matua i te tirohanga e rapu ana he aha te aroā o te tangata, te māramatanga, me te nui o te hunga e whai ana i ngā utunga tautoko moniwhiwhi.

He mea nui ki a mātou te mōhio mēnā e mōhio ana te tangata, ā, e whāia ana e rātou ngā utunga tautoko moniwhiwhi, nā te mea ko ngā utunga tautoko moniwhiwhi te huarahi matua e āwhina ai te kāwanatanga ki te whakaiti i te pōharatanga.

Ka pātai hoki te tirohanga he aha ngā take nui ki te tangata ki te whakaaro rātou ki te mahi, ā, mēnā ka pai ake tana noho mēnā i nui ake ngā moniwhiwhi.

Ko tētahi mea e hiahia ana mātou ko ngā taunakitanga pai ake, mēnā e whakaaro ana te tangata he pai ake tana whai tūranga mahi whai-utu, kia roa ake rānei ngā hāora mahi.

Ko te wā whakamutunga i kohia ai he mōhiohio mō ēnei take i tētahi tirohanga ā-motu, ko ngā tau 2006-07.

Ka whakarato tēnei tirohanga hou i ngā mōhiohio whaitake mō tēnei rā, ā, ka taea e mātou te whakataurite ki ngā hua o tērā atu tirohanga o mua.

Ko ētahi atu pātai i te tirohanga ka kohi i ngā taunakitanga whakakitenga ā-motu o ngā wheako o ngā tāngata i te wā ka tono i ngā utunga, me te ngāwari o te whiwhi i ngā utunga tautoko moniwhiwhi.

E mahi ana a MSD ki te whakapai ake i ngā wheako a ngā kiritaki i te wā ka haramai rātou ki a mātou mō te tautoko.

He mea nui te mārama mēnā he pai, kāore rānei i pai, ngā wheako a te tangata nā te mea e whakaatu ana ki a mātou ki hea kitea ai ngā hua o ngā whakapaitanga, ā, ki hea koke tonu ai.

E mārama ai ki te pai o te noho o ngā tāngata rerekē i ngā take rerekē, ka pātai te tirohanga mō te oranga, arā, mēnā i rahi te moniwhiwhi, te urunga o ngā tamariki ki ngā mahi, me te oranga o te whānau whānui.

Mā ēnei mōhiohio ka taea e tātau te titiro ki te hononga i waenganui i te oranga me te aroā o te tangata, me te nui o te hunga e whiwhi ana i ngā utunga tautoko moniwhiwhi. Mā tēnei e whiwhi taunaki ai mātou kia whai mōhio ai ngā kaupapahere anamata e whai nei ki te whakaiti i te pōharatanga, me te whakapiki i te oranga.

Hei āwhina kia puta ai he mōhiohio hei tūāpapa mō ngā kaupapahere, e whiu ana te tirohanga i ētahi pātai mō te whānau o te tangata, ngā whakaritenga tiaki tiri tamariki, me te tautoko me te tiaki e whakaratoa ana e ētahi atu kaitiaki.

E mōhio ana mātou he kanorau ake ngā whānau, me ngā whakaritenga tiaki me te tautoko tamariki i ēnei rā tēnā i o mua rā. Engari i tēnei wā kāore ā mātou mōhiohio pai hei āwhina i ngā kaupapahere tautoko moniwhiwhi hei urupare ki aua panoni. Ka whakaratoa e te tirohanga ētahi mōhiohio tino whaitake mō tēnei take.

Ka pātai te tirohanga mō ngā utu tiaki tamariki mā te hunga whai tamariki nohinohi. Ka noho ēnei mōhiohio hei whakaurunga hiranga ki ngā tohutohu mō te āwhinatanga tiaki tamariki.

Hei whakamutu ake, ka pātai te tirohanga i ngā pātai mō te tangata ake - arā, te pakeke, te mātāwaka, te ira, te tuakiri hōkakatanga, te hauora, mēnā he tāngata whaikaha, te wāhi whānau, ngā reo kōrero, ā, mēnā rānei ka whiwhi utunga tautoko moniwhiwhi i te wā nei.

Ko ngā pātai āhua matatapu ake, arā pērā i ngā pātai hauora, me ngā utunga tautoko moniwhiwhi e whiwhi ana te tangata, ka whakautua ā-tūmataititia, kia kore ai ngā kaiuiui e mōhio ki ngā whakautu.

Ka āwhina katoa ēnei mōhiohio i ngā kairangahau, ngā kaihanga kaupapahere me ngā tāngata e mahi ana ki te whakapai ake i te āhua o te tukunga o te tautoko moniwhiwhi, kia mārama pai ake ki ngā āhuatanga kanorau me ngā hiahia o ngā tāngata o Aotearoa.